जनकपुर, २९ साउन । धनुषाधाम नगरपालिका–६ स्थित श्री माध्यमिक विद्यालय हरिपुर निगाहपुरमा मधेश प्रदेशका खेलकुद तथा समाज कल्याण मन्त्री लखन दास तत्मालाई अनुगमनका क्रममा सम्मान गरिएको छ।
विद्यालयको समग्र अवस्था, शैक्षिक गतिविधि तथा आवश्यकताबारे जानकारी लिन पुगेका मन्त्री तत्मालाई विद्यालय परिवारले सम्मान गरेको हो।
कार्यक्रममा मन्त्री दास प्रमुख अतिथिका रूपमा सहभागी थिए भने कार्यक्रमको अध्यक्षता प्राध्यापक देव नारायण साहले गरेका थिए।
अनुगमनका क्रममा विद्यालय प्रशासनले विद्यालयमा रहेका विभिन्न समस्या तथा आवश्यकताबारे मन्त्री दासको ध्यानाकर्षण गराएको थियो। विशेषगरी विद्यालयको भौतिक पूर्वाधार, खेलकुदलगायतका क्षेत्रमा थप सहयोग आवश्यक रहेको विद्यालयले जनाएको थियो।
मन्त्री दासले विद्यालयका लागि आफूले यसअघि नै केही खेलकुद सामग्री उपलब्ध गराइसकेको जानकारी दिँदै आगामी दिनमा पनि आवश्यक सहयोगलाई निरन्तरता दिने प्रतिबद्धता जनाए।
उनले विद्यार्थीको क्षमता विकासका लागि खेलकुद महत्वपूर्ण भएकाले विद्यालयमा खेलकुद गतिविधि विस्तार गर्न सहयोग गर्ने बताए।
त्यसैगरी, विद्यालयका लागि आवश्यक पूर्वाधार निर्माण तथा अन्य समस्या समाधान गर्न प्रदेश सरकारसँग पहल गर्ने मन्त्री तत्माले आश्वासन दिए।
विद्यालयको अवस्थाबारे प्रत्यक्ष जानकारी लिँदा देखिएका समस्या समाधानका लागि सम्बन्धित निकायसँग समन्वय गर्ने उनको भनाइ थियो।
विद्यालयका अनुसार विद्यालय स्थापनापछि पहिलोपटक मन्त्रीस्तरका व्यक्ति विद्यालयमै आएर आफूहरूको समस्या र आवश्यकताबारे प्रत्यक्ष जानकारी लिएका हुन्।
मन्त्रीको अनुगमनले विद्यालयका समस्या समाधान हुने तथा आवश्यक सहयोग प्राप्त हुने अपेक्षा विद्यालय परिवारले गरेको छ।
कार्यक्रममा स्थानीय जनप्रतिनिधि, स्थानीयवासी, शिक्षक–कर्मचारी, विद्यार्थी, पत्रकार तथा विभिन्न क्षेत्रका व्यक्तिहरूको उपस्थिति थियो।
सहभागीहरूले विद्यालयको शैक्षिक गुणस्तर सुधारसँगै आवश्यक भौतिक पूर्वाधार निर्माण र खेलकुद विकासमा सरकारको थप ध्यान जानुपर्नेमा जोड दिएका थिए।
अन्तमा विद्यालयका विभिन्न समस्याबारे विद्यालयले ज्ञापनपत्र बुझाएका थिए।
