काठमाडौं, २७ साउन । स्वास्थ्य बीमा बोर्डले स्वास्थ्य बीमा कार्यक्रमअन्तर्गत उपलब्ध हुने औषधिको सूची परिमार्जन गर्दै संख्या घटाएको छ ।
नयाँ सुविधाअनुसार अब बीमामार्फत १ हजार १०२ प्रकारका औषधि उपलब्ध हुनेछन् । यसअघि १ हजार २८९ प्रकारका औषधि उपलब्ध रहेकामा १८७ प्रकार हटाइएको हो ।
बोर्डका सूचना अधिकारी विकेश मल्लका अनुसार एउटै उपचारमा प्रयोग हुने औषधिको दोहोरोपन हटाउन, सरकारले निःशुल्क उपलब्ध गराउने औषधि अलग गर्न तथा नेपालमा प्रयोगमा नरहेका औषधि सूचीबाट हटाइएको हो ।
नयाँ सुविधा थैली ३० असारमा स्वीकृत भई ५ साउनदेखि कार्यान्वयनमा आएको बोर्डले जनाएको छ। औषधिको संख्या घटाए पनि वैकल्पिक औषधिबाट उपचार व्यवस्थापन गर्न सकिने भएकाले बीमितको उपचारमा ठूलो असर नपर्ने बोर्डको दाबी छ ।
