जनकपुर, २५ साउन । अन्तर्राष्ट्रिय युवा दिवस २०२६ को अवसरमा मधेस प्रदेशस्तरीय समारोह जनकपुरधाममा सम्पन्न भएको छ।
मधेस प्रदेश सरकार, खेलकुद तथा समाज कल्याण मन्त्रालयको आयोजनामा भएको समारोहको अध्यक्षता मन्त्रालयका सचिव सुशील साहले गरेका थिए।
कार्यक्रममा प्रमुख अतिथिका रूपमा खेलकुद तथा समाज कल्याणमन्त्री लखन दाससहित युवा प्रतिनिधि, विभिन्न सरकारी तथा गैरसरकारी संघसंस्थाका प्रतिनिधि तथा सहयोगी साझेदार संस्थाहरूको सहभागिता रहेको थियो।
समारोहमा मधेस प्रदेशका युवाका समस्या, सम्भावना, अवसर, नेतृत्व विकास, रोजगारी, सीप विकास तथा नीति निर्माणमा युवा सहभागितालगायतका विषयमा छलफल गरिएको थियो।
कार्यक्रममा वक्ताहरूले प्रदेशको विकास र समृद्धिका लागि युवाको सक्रिय सहभागिता र नेतृत्व अपरिहार्य रहेकोमा जोड दिएका थिए।
युवालाई सीप, रोजगारी तथा नेतृत्व विकासका अवसर उपलब्ध गराउँदै उनीहरूको क्षमता विकासमा राज्यले प्राथमिकता दिनुपर्ने धारणा समेत व्यक्त गरिएको थियो।
अन्तर्राष्ट्रिय युवा दिवसका अवसरमा आयोजित कार्यक्रमले युवाका आवाज र समस्यालाई सम्बोधन गर्नुका साथै युवामैत्री नीति तथा कार्यक्रम निर्माणमा थप सहयोग पुग्ने अपेक्षा गरिएको आयोजकले जनाएको छ।
