काठमाडौँ, २५ साउन । धनुषाको ढल्केबरमा प्रस्तावित क्रिटिकल केयर तथा ट्रमा सेन्टर निर्माण प्रक्रिया नरोकिने स्वास्थ्य तथा खाद्य स्वच्छतामन्त्री निशा मेहताले स्पष्ट पारेकी छन् ।
सोमबार प्रतिनिधिसभाको बैठकमा बोल्दै मन्त्री मेहताले ढल्केबरमा दीर्घकालीन ट्रमा सेन्टर निर्माण अघि बढिरहेकै अवस्थामा तत्काल सेवा उपलब्ध गराउन लहानस्थित प्रादेशिक अस्पतालमा ट्रमा युनिट सञ्चालन गर्न लागिएको बताइन् ।
लहान अस्पतालमा सीटी स्क्यान, आवश्यक जनशक्ति, ब्लड बैंकलगायत पूर्वाधार उपलब्ध रहेकाले तत्कालका लागि त्यहाँ ट्रमा युनिट सञ्चालन गर्न लागिएको उनले बताईन ।
उनले लहानको ट्रमा युनिट ढल्केबरको विकल्प नभई नयाँ संरचना निर्माण सम्पन्न नहुँदासम्मको अन्तरिम व्यवस्था भएको स्पष्ट पारिन् ।
मन्त्री मेहताले दुर्घटनामा गम्भीर घाइतेलाई उपचारका लागि काठमाडौँ ल्याउनुपर्ने बाध्यता अन्त्य गर्न देशका विभिन्न स्थानमा ट्रमा सेवा विस्तार गर्ने सरकारको नीति रहेको बताइन् ।
