काठमाडौं, २३ साउन। डडेलधुराको परशुराम नगरपालिका–१२ का १२ परिवारले नापनक्सा भएको करिब ३८ वर्षपछि जग्गाधनी दर्ता प्रमाणपुर्जा (लालपुर्जा) पाएका छन्।
साविक जोगबुढा गाविस–१ मा २०४५ सालमै सुकुम्वासी समस्या समाधान आयोगले जग्गाको नापनक्सा गरेको थियो। तर प्रक्रिया पूरा हुन नसक्दा स्थानीयवासी लामो समयदेखि लालपुर्जाको पर्खाइमा थिए।
विगतका आयोगबाट अधुरो रहेको कामलाई हालको समितिले प्रचलित नियमअनुसार अघि बढाएपछि राजस्व संकलनसहित आवश्यक प्रक्रिया पूरा गरी १२ परिवारलाई लालपुर्जा वितरण गरिएको हो।
लामो समयपछि जग्गाको कानुनी स्वामित्व प्रमाणित गर्ने कागजात पाएपछि स्थानीय खुसी भएका छन्।
