सिरहा, १७ साउन । सुनसरीको देवानगञ्ज–३, कप्तानगञ्जमा ११ साउनमा दुई समुदायबीच भएको झडपका क्रममा प्रहरीको गोली लागेर २४ वर्षीय ओमप्रकाश मेहताको मृत्यु भएपछि त्यसको असर मधेशका विभिन्न जिल्लामा फैलिएको छ ।
घटनापछि सिरहा, धनुषालगायत जिल्लामा प्रदर्शन चर्किएको थियो । १४ साउनमा सिरहामा प्रदर्शन उग्र बन्दै प्रदर्शनकारी र प्रहरीबीच झडप हुँदा प्रहरीले चलाएको गोली लागेर औरही गाउँपालिका–२ का १५ वर्षीय गणेश यादवको मृत्यु भयो ।
त्यसपछि आगजनी, तोडफोड र हिंसात्मक गतिविधि बढ्दा घर, पसल तथा मलहरूमा करोडौं रुपैयाँ बराबरको क्षति भएको बताइएको छ ।
सुनसरीबाट सुरु भएको तनावका कारण सुनसरीका दुई र सिरहाका एक गरी तीन जनाको ज्यान गएको छ भने दुवै पक्षका थुप्रै व्यक्ति घाइते भएका छन् ।
घटनामा संलग्न भएको आरोपमा केही व्यक्तिलाई प्रहरीले पक्राउ गरेको छ । आगजनी तथा तोडफोडबाट भएको क्षतिको आधिकारिक विवरण भने अझै सार्वजनिक गरिएको छैन ।
