सिरहा, १७ साउन । जिल्ला प्रशासन कार्यालय सिरहाले गोलबजार नगरपालिका क्षेत्रमा जारी कफ्र्यू आदेश आइतबार बिहान १० बजेदेखि साँझ ७ बजेसम्मका लागि खुकुलो गरेको छ ।
प्रमुख जिल्ला अधिकारी सुरेन्द्र पौडेलद्वारा जारी सूचनाअनुसार सुरक्षा अवस्थाको समीक्षा गर्दै कफ्र्यू आंशिक रूपमा खुकुलो पारिएको हो। यस अवधिमा गोलबजार हुँदै सञ्चालन हुने लामो दूरीका सवारीसाधनलाई पनि सहजीकरण गरिने जनाइएको छ ।
यद्यपि, पाँच जनाभन्दा बढी व्यक्तिको समूहमा भेला हुन भने रोक कायम रहने प्रशासनले जनाएको छ ।
स्थानीय अवस्थाको थप मूल्यांकनपछि कफ्र्यू थप खुकुलो पार्ने वा पूर्ण रूपमा हटाउने विषयमा पुनः निर्णय गरिने उल्लेख गरिएको छ ।
