काठमाडौं, १५ साउन । पूर्वराष्ट्रपति डा. रामवरण यादवले मुलुकको पछिल्लो परिस्थितिप्रति चिन्ता व्यक्त गर्दै राष्ट्रिय एकता, सामाजिक सद्भाव र संविधानको संरक्षणका लागि सबै नेपाली एकजुट हुनुपर्ने बताएका छन् ।
राष्ट्रपति रामचन्द्र पौडेलले शीतल निवासमा आयोजना गरेको छलफलपछि सञ्चारकर्मीसँग कुरा गर्दै उनले बल प्रयोगभन्दा संवाद, संयमता र समन्वयमार्फत समस्या समाधान गर्नुपर्नेमा जोड दिए ।
साथै, राज्यले सबै राजनीतिक दल, नागरिक समाज र धार्मिक अगुवासँग सहकार्य गर्दै अघि बढ्नुपर्ने उनको भनाइ थियो । सुनसरी घटनापछि तराईका विभिन्न जिल्लामा भएका झडपमा तीन जनाको मृत्यु भएकोप्रति दुःख व्यक्त गर्दै उनले मृतक परिवारप्रति समवेदना प्रकट गरे ।
सामाजिक सञ्जालमा फैलिने गलत सूचनाप्रति सचेत रहन आग्रह गर्दै राज्यले समयमै सही सूचना प्रवाह र प्रभावकारी व्यवस्थापन गर्नुपर्ने यादवले बताए ।
उनले विविधतामा एकता नै नेपालको शक्ति भएको उल्लेख गर्दै कुनै पनि बहानामा सामाजिक विखण्डन हुन नदिन सबै नागरिकले जिम्मेवार भूमिका निर्वाह गर्नुपर्ने धारणा व्यक्त गरे ।
