काठमाडौं, १२ साउन । नेपाली कांग्रेसका वरिष्ठ नेता तथा पूर्वउपप्रधानमन्त्री गोपालमान श्रेष्ठको ८३ वर्षको उमेरमा निधन भएको छ ।
जावलाखेलस्थित अस्पतालमा उपचारका क्रममा उनको निधन भएको हो । पञ्चायती व्यवस्थाविरुद्धको आन्दोलनबाट राजनीतिक यात्रा सुरु गरेका श्रेष्ठ बहुदलीय प्रजातन्त्र, शान्ति प्रक्रिया र गणतन्त्र स्थापनासम्मका राजनीतिक परिवर्तनका साक्षी तथा सहभागी नेता थिए ।
स्याङ्जाबाट राष्ट्रिय राजनीतिमा स्थापित भएका उनले प्रतिनिधिसभा सदस्य, उपप्रधानमन्त्री तथा शिक्षामन्त्रीको जिम्मेवारी सम्हालेका थिए ।
कांग्रेसभित्र शेरबहादुर देउवा निकट नेताका रूपमा परिचित श्रेष्ठ संगठन निर्माण, पार्टी समन्वय र नीति निर्माणमा सक्रिय थिए । उनको निधनसँगै नेपाली कांग्रेसले लामो राजनीतिक अनुभव भएका एक वरिष्ठ नेतालाई गुमाएको छ ।
