काठमाडौं, ५ साउन । बाढी पूर्वानुमान महाशाखाले आज -मंगलबार) देशका ११ जिल्ला र आसपासका क्षेत्रमा बग्ने ससाना खोला तथा नदीमा आकस्मिक बाढीको मध्यम जोखिम रहेको जनाएको छ ।
झापा, उदयपुर, मकवानपुर, गोरखा, लमजुङ, जाजरकोट, दैलेख, कालीकोट, डोटी, डडेलधुरा र बैतडीका नदी तथा खोलाको बहाव उल्लेख्य बढ्न सक्ने भएकाले सतर्कता अपनाउन आग्रह गरिएको छ ।
यस्तै, मौसम पूर्वानुमान महाशाखाका अनुसार आज देशभर सामान्यदेखि पूर्ण बदली रहनेछ । पहाडी भूभागका धेरै स्थान तथा तराईका केही क्षेत्रमा मेघगर्जन, चट्याङसहित मध्यम वर्षाको सम्भावना छ भने बागमतीसहित केही पहाडी तथा हिमाली क्षेत्रमा भारी वर्षा हुन सक्ने पूर्वानुमान गरिएको छ ।
रातिको समयमा पनि देशका विभिन्न स्थानमा वर्षा जारी रहने सम्भावना रहेको महाशाखाले जनाएको छ ।
