काठमाडौं, साउन ३ । रुकुम पूर्व केन्द्रबिन्दु भएर आइतबार साँझ ५ म्याग्निच्युडको भूकम्प गएको छ ।
राष्ट्रिय भूकम्प मापन तथा अनुसन्धान केन्द्रका अनुसार साँझ ४ बजेर ३० मिनेटमा रुकुम पूर्वको कोल क्षेत्रलाई केन्द्रबिन्दु बनाएर स्थानीय मापन -एमएल) अनुसार ५.० म्याग्निच्युडको भूकम्प गएको हो ।
भूकम्पको धक्का रुकुम पूर्वसहित आसपासका विभिन्न जिल्लामा समेत महसुस भएको छ । अर्घाखाँची, दाङ, रोल्पा लगायतका जिल्लाका स्थानीयहरूले पनि कडा धक्का महसुस भएको बताएका छन् ।
भूकम्पपछि केही समय स्थानीयवासी त्रसित बनेका भए पनि हालसम्म मानवीय वा भौतिक क्षतिको कुनै आधिकारिक विवरण प्राप्त भएको छैन।
सम्बन्धित निकायले सम्भावित क्षतिको विवरण संकलन गरिरहेको जनाएको छ । भूकम्पपछि स्थानीय प्रशासन तथा सुरक्षा निकायले प्रभावित क्षेत्रको अवस्थाबारे जानकारी संकलन गरिरहेका छन् ।
अधिकारीहरूले नागरिकलाई अफवाहमा विश्वास नगर्न र आवश्यक सतर्कता अपनाउन आग्रह गरेका छन् ।
