जनकपुर, ३२ असार । मधेश प्रदेश सरकारले अति विपन्न तथा अपाङ्गता भएका व्यक्तिहरूको दैनिक जीवन सहज बनाउन १७ थान विद्युतीय (इलेक्ट्रिक) ट्राइसाइकल वितरण गरेको छ।
खेलकुद तथा समाज कल्याण मन्त्रालयको आर्थिक वर्ष २०८२/८३ को स्वीकृत बजेट तथा कार्यक्रमअन्तर्गत आयोजित कार्यक्रममा खेलकुद तथा समाज कल्याणमन्त्री लखन दासले लाभग्राहीहरूलाई ट्राइसाइकल हस्तान्तरण गर्नुभएको हो।
कार्यक्रममा मन्त्रालयका सचिव सुशील कुमार साह तेली, वरिष्ठ उपसचिव धर्मेन्द्र लाल कर्ण, मन्त्रालयका कर्मचारी, अपाङ्गता भएका व्यक्तिहरू तथा विभिन्न सरोकारवालाको उपस्थिति रहेको थियो।
कार्यक्रमलाई सम्बोधन गर्दै मन्त्री दासले अपाङ्गता भएका व्यक्तिहरूलाई सम्मानजनक, सहज र आत्मनिर्भर जीवनयापनको अवसर उपलब्ध गराउन प्रदेश सरकार प्रतिबद्ध रहेको बताउनुभयो।
यस्ता सहयोगमूलक कार्यक्रम आगामी वर्षहरूमा पनि निरन्तर सञ्चालन गरिने उहाँले जानकारी दिनुभयो।
ट्राइसाइकल प्राप्त गरेका लाभग्राहीहरूले यसले दैनिक आवतजावत, शिक्षा, स्वास्थ्य सेवा तथा रोजगारीमा पहुँच सहज हुने विश्वास व्यक्त गर्दै प्रदेश सरकारप्रति आभार प्रकट गरेका थिए।
