जनकपुर, ३२ असार । जानकी मन्दिरका मुख्य महन्थ राम तपेश्वर दास वैष्णवले मधेश प्रदेशका गृह, सञ्चार तथा कानुन मन्त्री फकिरा महतोलाई ‘गुण्डा’ भनेपछि उत्पन्न विवादले नयाँ मोड लिएको छ ।
मन्त्री महतोले बिहिवार पत्रकार सम्मेलन गर्दै उक्त अभिव्यक्तिप्रति आपत्ति जनाएका छन् । केही दिनअघि मन्त्री महतोले जनकी मन्दिर परिसरमा सञ्चालन भएका पसल तथा विवाह मण्डपमा लिइँदै आएको प्रवेश शुल्कको विषयमा अनुगमन तथा चासो व्यक्त गरेपछि महन्थ र मन्त्रीबीच विवाद चर्किएको थियो ।
त्यसक्रममा महन्थ वैष्णवको निर्देशनमा विवाह मण्डपको प्रवेशद्वार केही घण्टाका लागि बन्द गरिएको थियो । पत्रकार सम्मेलनमा मन्त्री महतोले सरकारका प्रतिनिधिलाई लक्षित गर्दै प्रयोग गरिएको ‘गुण्डा’ जस्तो शब्दप्रति गम्भीर आपत्ति जनाउँदै कानुन र विधिअनुसार सबै पक्षले जिम्मेवार ढंगले व्यवहार गर्नुपर्ने धारणा राखेका छन्।
जनकी मन्दिरमा उठाइएको शुल्क र त्यससम्बन्धी विवादबारे सम्बन्धित निकायले आवश्यक प्रक्रिया अघि बढाउने उनले बताएका छन् ।
