जनकपुर, ३१ असार । मधेश प्रदेशसभाको मंगलबार बसेको बैठकमा प्रदेशसभा सदस्य ललिता दास विद्रोहीले प्रदेश सरकारको मन्त्रालय संरचना, बजेट व्यवस्थापन र दलित आवासको विषयमा सरकारको चर्को आलोचना गरेकी छन् ।
बैठकमा बोल्दै उनले प्रदेशमा धेरै मन्त्रालय आवश्यक नभएको भन्दै मन्त्रालयको संख्या घटाउनुपर्ने धारणा राखिन् । उनले मुख्यमन्त्री र अर्थमन्त्री भए पनि प्रदेश सरकार सञ्चालन गर्न सकिने टिप्पणी गरिन् ।
बजेट व्यवस्थापनप्रति असन्तुष्टि जनाउँदै उनले दारु र भाङ खाएर बजेट बनाएको जस्तो, एउटा मन्त्रालयको बजेट अर्को मन्त्रालयमा कसरी जान्छ ? भन्दै सरकारको कार्यशैलीमाथि प्रश्न उठाइन् ।
सांसद विद्रोहीले सिरहामा तीन बालबालिकाको ज्यान गएको घटनाप्रति सरकार गम्भीर बन्नुपर्ने बताउँदै उक्त घटनाको जिम्मेवारी सरकारले लिनुपर्ने माग गरिन् ।
त्यसैगरी, उनले दलित आवास सम्बन्धी विषयलाई पनि प्राथमिकताका साथ उठाउँदै दलित समुदायका लागि प्रभावकारी आवास कार्यक्रम सञ्चालन गर्न प्रदेश सरकारको ध्यानाकर्षण गराइन् ।
