काठमाडौं, ३० असार । लामो समयदेखि बन्द रहेको हेटौँडा कपडा उद्योग पुनः सञ्चालनको तयारी तीव्र पारिएको छ ।
उद्योग, वाणिज्य तथा आपूर्तिमन्त्री गौरीकुमारी यादवलाई अध्ययन कार्यदलले परीक्षण उत्पादनदेखि दीर्घकालीन सञ्चालनसम्मको कार्ययोजना सहितको प्रतिवेदन बुझाएको हो ।
प्रतिवेदनअनुसार नेपाली सेनाले आगामी दुई महिनाभित्र परीक्षण उत्पादन सुरु गर्ने लक्ष्यसहित मेसिन मर्मत, सरसफाइ र कच्चा पदार्थ खरिदको काम अघि बढाइसकेको छ ।
अर्थ मन्त्रालयले प्रारम्भिक कार्यका लागि ३३ लाख रुपैयाँ बजेट निकासा गरिसकेको छ भने भौतिक पूर्वाधार मर्मतका लागि ५० लाख रुपैयाँको लागत अनुमान तयार गरिएको छ ।
परीक्षण उत्पादनपछि विस्तृत परियोजना प्रतिवेदन -डीपीआर) तयार गरी उद्योगलाई पूर्ण क्षमतामा सञ्चालन गर्ने सरकारको योजना रहेको छ ।
