काठमाडौं, २९ असार । सरकारले नेपाल दूरसञ्चार प्राधिकरणको अध्यक्षमा अर्जुन घिमिरेलाई पाँच वर्षका लागि नियुक्त गरेको छ ।
मन्त्रिपरिषद्को पछिल्लो बैठकले उनको नियुक्तिको निर्णय गरेको हो भने केहीबेरमै सूचना तथा सञ्चार मन्त्रालयमा शपथ ग्रहण कार्यक्रम हुने जनाइएको छ ।
यसअघि विशेष अध्यादेशमार्फत तत्कालीन अध्यक्ष भूपेन्द्र भण्डारी पदमुक्त भएपछि घिमिरेले निमित्त अध्यक्षको जिम्मेवारी सम्हाल्दै आएका थिए ।
उनी प्राधिकरणमा लामो समयदेखि आर्थिक विश्लेषण तथा उपभोक्ता हित संरक्षण क्षेत्रमा कार्यरत रहँदै उपभोक्ता हित संरक्षण महाशाखाको प्रमुखको जिम्मेवारीसमेत निर्वाह गरिसकेका छन् ।
वालेन्द्र शाह नेतृत्वको सरकारले सार्वजनिक पदाधिकारीको पदमुक्तिसम्बन्धी विशेष व्यवस्था अध्यादेश, २०८३ जारी गरेपछि दूरसञ्चार प्राधिकरणका अध्यक्षसहित सदस्यहरू पदमुक्त भएका थिए ।
त्यसपछि रिक्त पदपूर्तिका लागि खुला आवेदन आह्वान गरिएको थियो । अध्यक्ष पदका लागि २९ जनाको आवेदन परेकोमा छनोट समितिले नौ जनाको संक्षिप्त सूची सार्वजनिक गरेको थियो ।
अन्तर्वार्ता र कार्ययोजना प्रस्तुतीकरणपछि अन्तिम प्रतिस्पर्धामा रहेका प्रमुख दाबेदारमध्येबाट सरकारले अर्जुन घिमिरेलाई प्राधिकरणको नयाँ अध्यक्ष नियुक्त गरेको हो ।
