काठमाडौं, २९ असार । आत्मदाहपछि मृत्यु भएका गणेश नेपालीको परिवारले सोमबार प्रहरीमा जाहेरी दर्ता गर्ने तयारी गरेको छ ।
परिवार प्रहरी वृत्त कालीमाटी पुगेको छ भने प्रहरीले जाहेरी दर्ता गरी कानुनी प्रक्रिया अघि बढाइने जनाएको छ ।
जिल्ला प्रहरी परिसर काठमाडौंका अनुसार अप्राकृतिक मृत्युका घटनामा पोस्टमार्टम, शव जिम्मा लगाउने र आवश्यक देखिए मुद्दा दर्ता गरी अनुसन्धान अघि बढाइन्छ ।
राहदानी विभाग अगाडि महानगर प्रहरीले मोटरसाइकलमा ह्वील लक लगाएपछि भएको विवादका क्रममा नेपालीले शरीरमा पेट्रोल छर्केर आत्मदाह गरेका थिए।
उपचारकै क्रममा उनको वीर अस्पतालमा मृत्यु भएको थियो । घटनाको अनुसन्धानका लागि काठमाडौं उपत्यका प्रहरी कार्यालय रानीपोखरीका डीआईजी गोविन्द थपलियाको नेतृत्वमा पाँच सदस्यीय छानबिन समिति गठन गरिएको छ ।
