काठमाडौं, २९ असार । आज काठमाडौं उपत्यकासहित देशका ३५ जिल्लामा बाढीको जोखिम बढ्न सक्ने भन्दै बाढी पूर्वानुमान महाशाखाले सतर्कता अपनाउन सर्वसाधारणलाई आग्रह गरेको छ ।
महाशाखाका अनुसार काठमाडौं, भक्तपुर, ललितपुर, काभ्रेपलाञ्चोक तथा आसपासका क्षेत्रमा सबैभन्दा बढी बाढीको जोखिम रहेको छ। यी जिल्लाबाट बग्ने केही साना नदी तथा खोलामा आकस्मिक बाढी आउने उच्च सम्भावना रहेको जनाइएको छ ।
यस्तै, पाँचथर, इलाम, झापा, मोरङ, सप्तरी, सुनसरी, भोजपुर, संखुवासभा, दोलखा, रामेछाप, सिन्धुली, सिन्धुपाल्चोक, रसुवा, नुवाकोट, धादिङ, गोरखा, लम्जुङ, तनहुँ, मकवानपुर, बारा, पर्सा, रौतहट, चितवन, नवलपरासी -पूर्व र पश्चिम), पाल्पा, कास्की, पर्वत, म्याग्दी, स्याङ्जा, कैलालीलगायत जिल्लाका साना नदी तथा खोलामा पानीको बहाव उल्लेख्य रूपमा बढ्न सक्ने र आकस्मिक बाढीको मध्यम जोखिम रहने पूर्वानुमान गरिएको छ ।
महाशाखाले ती क्षेत्रका नदी किनार, तटीय बस्ती तथा डुबान प्रभावित स्थानका बासिन्दालाई आवश्यक सतर्कता अपनाउन, अनावश्यक रूपमा नदी तथा खोलाको आसपास नजान र स्थानीय प्रशासन तथा सम्बन्धित निकायले जारी गर्ने सूचनालाई पालना गर्न आग्रह गरेको छ ।
