विराटनगर, २६ असार । विराटनगरको भेडियारीमा गाँजा तस्करीको आरोपमा प्रहरीबाट लखेटिएका १७ वर्षीय मञ्जितकुमार यादवको शव उठाउने क्रममा तनाव उत्पन्न भएपछि प्रहरीले बल प्रयोग गरेको छ ।
बुधबार ६ किलो १२० ग्राम गाँजासहित पक्राउबाट भाग्ने क्रममा पोखरीमा हाम फालेका यादवको शव शुक्रबार बिहान फेला परेको थियो ।
आफन्त र स्थानीयले क्षतिपूर्ति तथा दोषी प्रहरीमाथि कारबाहीको माग गर्दै शव उठाउन अवरोध गरेपछि ढुंगामुढा भएको र स्थिति नियन्त्रणमा लिन प्रहरीले २१ सेल अश्रुग्यास प्रहार गरेको जनाएको छ ।
घटनामा दुई सुरक्षाकर्मी सामान्य घाइते भएका छन् भने दुई प्रदर्शनकारीलाई नियन्त्रणमा लिइएको छ । शव पोस्टमार्टमका लागि कोशी अस्पताल पठाइएको प्रहरीले जनाएको छ ।
