काठमाडौं, २३ असार । अख्तियार दुरुपयोग अनुसन्धान आयोगले रौतहटको गढीमाई नगरपालिकाका मेयर श्याम प्रसाद यादवसहित चार जनाविरुद्ध २ करोड ५७ लाख ६२ हजार रुपैयाँ बराबरको भ्रष्टाचार मुद्दा विशेष अदालतमा दायर गरेको छ।
आयोगका अनुसार आर्थिक वर्ष २०७६/०७७ मा समनपुरघाटको नदीजन्य पदार्थ उत्खननको ठेक्कामा राजस्व हिनामिना भएको आरोप लागेको हो। ठेक्काको सर्त पूरा नगरी फर्जी विवरणका आधारमा उत्खनन अनुमति दिँदा नगरपालिकालाई ठूलो राजस्व नोक्सानी पुगेको दाबी गरिएको छ।
अख्तियारले मेयर यादव, तत्कालीन निमित्त प्रमुख प्रशासकीय अधिकृत, राजस्व शाखा प्रमुख तथा ठेकेदार कम्पनीका प्रतिनिधिविरुद्ध बिगो असुल, जरिवाना र कैद सजायको माग गर्दै मुद्दा दायर गरेको जनाए ।
