काठमाडौं, १९ असार। नेपाली कांग्रेसका सभापति गगन थापाले नेपालको शिक्षा क्षेत्रमा देखिएको दलीयकरण अन्त्य गर्नुपर्ने बताएका छन्। पार्टी केन्द्रीय कार्यालयमा आयोजित एक कार्यक्रममा बोल्दै उनले शिक्षामा राजनीतिक हस्तक्षेपभन्दा पनि दलीय प्रभावले गम्भीर समस्या सिर्जना गरेको टिप्पणी गरे।
उनले विद्यालय व्यवस्थापन समिति, प्रधानाध्यापक र शिक्षक नियुक्तिमा आफ्ना दलनिकट व्यक्तिलाई प्राथमिकता दिने प्रवृत्तिले शिक्षा क्षेत्र कमजोर बनेको बताए। यस्तो अभ्यासबाट बाहिर निस्किएर शिक्षा प्रणालीलाई निष्पक्ष र व्यावसायिक बनाउनुपर्नेमा उनले जोड दिए।
थापाले पार्टीसँग आबद्ध शिक्षकहरूलाई विद्यालयमा आफ्नो जिम्मेवारी इमानदारीपूर्वक पूरा गर्न आग्रह गर्दै त्यसैबाट समाज र देशको विकासमा महत्त्वपूर्ण योगदान पुग्ने बताए।
उनका अनुसार शिक्षकहरूले आफ्नो पेशागत भूमिका प्रभावकारी रूपमा निर्वाह गर्नु नै पार्टीप्रतिको सबैभन्दा ठूलो योगदान हुनेछ।
