विराटनगर, ११ असार । मोरङको बेलबारी नगरपालिका–३ का वडाध्यक्ष योगेन्द्र सुवेदी रास्वपाको महाधिवेशनमा प्रतिनिधि बनेर सहभागी भएपछि एमालेले उनलाई पदमुक्त गर्न सिफारिस गरेको छ ।
एमाले मोरङ जिल्ला पदाधिकारी बैठकले सुवेदीलाई दल त्यागसम्बन्धी कारबाही स्वरूप पदमुक्त गर्न सिफारिस गर्ने निर्णय गरेको हो ।
एमालेबाट निर्वाचित सुवेदीले सामाजिक सञ्जालमार्फत रास्वपाका केन्द्रीय सदस्य पदका उम्मेदवार गणेश कार्कीको पक्षमा प्रचारसमेत गरेका थिए ।
उनी यसअघि एमाले मोरङका जिल्ला सदस्य भए पनि पछिल्लो समय पार्टी गतिविधिबाट निष्क्रिय थिए । यसअघि पनि मोरङका दुई वडाध्यक्ष दल परिवर्तन गरेपछि निर्वाचन आयोगबाट पदमुक्त भइसकेका छन् ।
