काठमाडौं, ४ आसार । अख्तियार दुरुपयोग अनुसन्धान आयोगले ई–पासपोर्ट खरिद प्रक्रियामा अनियमितता भएको आशंकामा तिर्थराज अर्याल सहित चार जनामाथि अनुसन्धान अघि बढाएको छ ।
अनुसन्धान मुख्यतः चार विषयमा केन्द्रित छ— सर्भरको गुणस्तर तथा योग्य कम्पनी छनोट, पासपोर्ट छपाइ गर्ने प्रिन्टरको क्षमता र संख्या, ठेक्कामा सामान तथा कामको दोहोरोपन, र विनिमय दरको मूल्यांकन।
उजुरीअनुसार मापदण्डविपरीत कम्पनी छनोट, आवश्यक उपकरणको कमी, दोहोरो खरिद तथा विनिमय दरको गलत आधार प्रयोगका कारण राज्यलाई ठूलो आर्थिक भार परेको आशंका गरिएको छ ।
उजुरीकर्ताले करिब एक अर्ब रुपैयाँ बराबरको अनियमितता भएको दाबी गरे पनि अनुसन्धान अझै निष्कर्षमा पुगेको छैन ।
