जनकपुर, ४ असार । धनुषाको जनकपुरधाम उपमहानगरपालिका-३ निवासी मग्नु दासको उपचारका लागि परिवारले आर्थिक सहयोगको अपिल गरेको छ।
चोरको आरोपमा कुटपिटबाट गम्भीर घाइते भएका दास हाल जनकपुरधामस्थित स्वस्तिक अस्पतालमा उपचाररत छन्। परिवारका अनुसार दास केही वर्षअघि मोटरसाइकल दुर्घटनामा परेर टाउकोमा गम्भीर चोट लागेपछि ब्रेन अपरेशन गरिएको थियो। त्यसयता उनको मानसिक अवस्था कमजोर रहँदै आएको छ। विगत ४–५ वर्षदेखि उनी कठिन जीवन बिताइरहेका छन्।
हालै खाना माग्न एक व्यक्तिको घरमा पुगेका बेला उनलाई चोरको आरोप लगाउँदै बासको भाटा लगायतका सामग्रीले निर्घात कुटपिट गरिएको परिवारको आरोप छ। उक्त घटनामा उनको हात, खुट्टा, छाती, पाखुरा, औँला तथा टाउकोलगायत शरीरका विभिन्न भागमा गम्भीर चोट लागेको छ। केही हड्डीसमेत भाँचिएको बताइएको छ।
उपचारमा हालसम्म करिब ६ देखि ७ लाख रुपैयाँ खर्च भइसकेको परिवारले जनाएको छ। पीडितकी छोरीले आफ्ना गरगहना बेचेर करिब १ लाख ५० हजार रुपैयाँ अस्पतालमा बुझाइसकेकी छन्। तर अझै ठूलो रकम तिर्न बाँकी रहेको र थप उपचारका लागि बाहिर लैजानुपर्ने अवस्था रहेको बताइएको छ।
परिवारको आर्थिक अवस्था अत्यन्त कमजोर रहेको छ। दासकी श्रीमती अरूको घरमा भाडा–बर्तन माझेर जीविकोपार्जन गर्दै आएकी छन्। परिवारले यसअघि एक छोरासमेत गुमाइसकेको पीडा बोकेको छ। हाल बिरामी श्रीमान्, वृद्ध पत्नी र छोरीबाहेक परिवारलाई सहारा दिने कोही छैन।
उपचार खर्च जुटाउन समस्या भएपछि परिवारले सम्पूर्ण मानवताप्रेमी दाजुभाइ तथा दिदीबहिनीसँग आर्थिक सहयोगका लागि हार्दिक अपिल गरेको छ। परिवारले सानो सहयोगले पनि बिरामीको उपचार र जीवन बचाउन ठूलो मद्दत पुग्ने विश्वास व्यक्त गरेको छ।
