काठमाडौं, ४ असार । प्रतिनिधिसभाको बुधबार बस्ने बैठकमा विनियोजन विधेयक, २०८३ अन्तर्गत विभिन्न मन्त्रालयका बजेट शीर्षकमाथि उठेका प्रश्नहरूको सम्बन्धित मन्त्रीहरूले जवाफ दिनेछन् ।
शिक्षा, गृह, अर्थ, रक्षा, ऊर्जा, परराष्ट्रलगायत मन्त्रालयको बजेटमाथि छलफल हुने कार्यसूची छ । बैठकमा विभिन्न मन्त्रालयका बजेट शीर्षकमा २० सांसदले दर्ता गरेका खर्च कटौती प्रस्तावलाई निर्णयार्थ प्रस्तुत गरिनेछ ।
त्यसपछि विनियोजन विधेयकका दफामाथि निर्णय गरी अर्थमन्त्री डा. स्वर्णिम वाग्लेले विधेयक पारित गरियोस् भन्ने प्रस्ताव सदनमा पेश गर्ने कार्यक्रम रहेको संसद् सचिवालयले जनाएको छ ।
