जनकपुर, ३ असार । धनुषामा मिटरव्याजी समस्याको प्रभाव अझै पूर्ण रूपमा अन्त्य हुन नसकेको अवस्थामा ऋण दिने बहानामा जग्गा र चेक दुवै आफ्नो नियन्त्रणमा लिएर ठगी गर्ने नयाँ शैली सार्वजनिक भएको छ ।
धनुषाको क्षीरेश्वरनाथ नगरपालिका–५ निवासी राकेश कुमार महतोले जनकपुरधाम उपमहानगरपालिका–१० निवासी सचिन साहमाथि आफूलाई लाखौं रुपैयाँ बराबरको ठगी गरेको आरोप लगाएका छन् ।
बुधबार जनकपुरधाममा आयोजित पत्रकार सम्मेलनमा महतोले आफूले व्यवसाय विस्तारका लागि लिएको ऋण फिर्ता गरिसके पनि आफ्नो जग्गा फिर्ता नपाएको गुनासो गरे ।
उनका अनुसार २०८१ असार २३ गते हरिहरपुर क्षेत्रमा १ कठ्ठा ४ धुर जग्गा खरिद गरेका थिए । जलेश्वरमा कवाड व्यवसाय सञ्चालन गर्दै आएका उनले व्यवसाय विस्तारका लागि ६ लाख रुपैयाँ ऋण आवश्यक परेपछि सचिन साहसँग सहयोग मागेका थिए । महतोका अनुसार साहले जग्गा धितो राखे मात्र ऋण उपलब्ध गराउने शर्त राखे ।
त्यसपछि २०८१ चैत १० गते उनले आफ्नो नाममा रहेको जग्गा साहको नाममा राजीनामा गरिदिए। साथै ऋण सुरक्षाका लागि ६ लाख रुपैयाँ बराबरको मिति उल्लेख नगरिएको चेक समेत साहलाई बुझाएको उनले बताए ।
महतोले ऋण लिएपछि व्यवसायबाट भएको आम्दानीमार्फत करिब ८–९ महिनाभित्र सम्पूर्ण रकम फिर्ता गरिसकेको दाबी गरेका छन् ।
बैंक खाता तथा नगदमार्फत रकम बुझाएको प्रमाण आफूसँग रहेको उल्लेख गर्दै उनले ऋण चुक्ता भइसके पनि साहले जग्गा फिर्ता गर्न नमानेको आरोप लगाए । पत्रकार सम्मेलनमा बोल्दै महतोले भने, æमैले लिएको ऋण पूर्ण रूपमा फिर्ता गरिसकेको छु । तर अहिले मेरो जग्गा फिर्ता दिन अस्वीकार गरिएको छ ।
करिब ५० लाख रुपैयाँ मूल्य बराबरको सम्पत्ति कब्जा गरिएको छ । उनले यस विषयमा जिल्ला प्रहरी कार्यालय धनुषामा निवेदन दिएको भए पनि निवेदन दर्ता नगरिएको आरोप लगाए । चैत २५ गते निवेदन पेश गरेदेखि हालसम्म पटक–पटक धाउँदा समेत प्रहरीले दर्ता नगरेको उनको भनाइ छ ।
पत्रकार सम्मेलनमा सहभागी अनिता देवीले पनि सचिन साहमाथि आफ्नो नागरिकताको दुरुपयोग गरी संस्था दर्ता गरेर भ्याट कारोबार सञ्चालन गरेको आरोप लगाइन् । उनले साह र उनकी श्रीमतीले नागरिकता मागेर लगेपछि आफ्नो नाममा संस्था सञ्चालन भइरहेको जानकारी पछि मात्र थाहा पाएको बताइन् । अनिताका अनुसार साहले केही ब्ल्याङ्क चेकमा समेत हस्ताक्षर गराएका थिए ।
राकेश महतोसँगको ऋण कारोबारमा आफ्नो नामको चेक प्रयोग गरिएको भए पनि उक्त चेक आफूलाई नदिई साहले नै राखेको उनको दाबी छ । त्यसैगरी पत्रकार सम्मेलनमा उपस्थित काजल मण्डलले पनि आफ्नो नागरिकताको प्रतिलिपि प्रयोग गरी संस्था दर्ता गरेर भ्याट कारोबार सञ्चालन गरिएको जानकारी आफूलाई पछि मात्र भएको बताइन् ।
संस्थामा काम गर्ने क्रममा नागरिकताको प्रतिलिपि मागिएको र त्यसको दुरुपयोग भएको थाहा पाएपछि आफू न्यायको खोजीमा सार्वजनिक रूपमा बोल्न बाध्य भएको उनको भनाइ छ ।
यसैबीच सचिन साह हाल धाकधम्कीसम्बन्धी मुद्दामा जिल्ला प्रहरी कार्यालय धनुषाको हिरासतमा रहेको जानकारी पत्रकार सम्मेलनमा दिइएको छ । यद्यपि यस विषयमा प्रहरीले औपचारिक पुष्टि गरेको छैन ।
साहसँग दुई देशको नागरिकता रहेको आरोप समेत सार्वजनिक गरिएको छ । पत्रकार सम्मेलनमा सहभागी पीडितहरूले सम्बन्धित निकायसँग घटनाको निष्पक्ष छानबिन गर्न, पीडितलाई न्याय दिलाउन तथा नागरिकता दुरुपयोग, चेक कारोबार र जग्गा हडप्ने सम्बन्धी आरोपहरूको सत्यतथ्य सार्वजनिक गर्न माग गरेका छन्।
उनीहरूले दोषीमाथि कानुनी कारबाही गरी यस्ता घटनाको पुनरावृत्ति रोक्न समेत आग्रह गरेका छन् ।
