जनकपुर, २ जेष्ठ । मधेस प्रदेशका १३६ स्थानीय तहमा कार्यरत जनस्वास्थ्य प्रयोगशालाका कर्मचारीले सात महिनादेखि तलब, चाडपर्व भत्ता तथा अन्य सेवा-सुविधा नपाएको भन्दै आन्दोलन सुरु गरेका छन् ।
कर्मचारीहरूले जनकपुरस्थित प्रादेशिक जनस्वास्थ्य प्रयोगशालाको कार्यालय अगाडि धर्ना दिँदै रोकिएको तलब भुक्तानी, सेवा सम्झौता नवीकरण, पोशाक भत्ता, जोखिम भत्ता र महँगी भत्ता उपलब्ध गराउन माग गरेका छन् ।
संयुक्त संघर्ष समितिका संयोजक साहिद राइनले सम्बन्धित निकायलाई पटक–पटक ध्यानाकर्षण गराउँदा पनि सुनुवाइ नभएको बताए ।
आन्दोलनरत कर्मचारीले माग तत्काल सम्बोधन नभए थप कडा आन्दोलनमा उत्रिने चेतावनी दिएका छन् ।
