काठमाडौं, २८ जेठ । प्रतिनिधिसभामा बजेटमाथिको छलफलका क्रममा रास्वपाका सांसद डा. अमरेशकुमार सिंहले अर्थमन्त्री डा. स्वर्णिम वाग्लेमाथि कटाक्ष गर्दै बजेट कार्यान्वयन हुन नसक्ने दाबी गरेका छन् ।
बिहीबार संसदमा बोल्दै उनले शिक्षा र स्वास्थ्यजस्ता संविधानले सुनिश्चित गरेका मौलिक अधिकारका क्षेत्रमा कर लगाउनु संविधानको मर्मविपरीत भएको बताए ।
बूढानीलकण्ठ विद्यालयमा अध्ययन गरेका अर्थमन्त्रीबाट देशभर गुणस्तरीय विद्यालय विस्तारको अपेक्षा गरेको भए पनि बजेटमा त्यस्तो योजना नदेखिएको उनको भनाइ थियो ।
सिंहले बजेटले किसान, गरिब, दलित, चेपाङ तथा दुर्गम क्षेत्रका नागरिकका समस्या सम्बोधन गर्न नसकेको आरोप लगाए । उनले युवाको बेरोजगारी, कृषि उत्पादन, व्यापार घाटा र बढ्दो महँगीका विषयमा सरकार गम्भीर नभएको टिप्पणी गरे ।
बजेटको आकार अत्यधिक ठूलो रहेको र ठूलो हिस्सा ऋणमार्फत व्यवस्थापन गर्न खोजिएको भन्दै उनले नयाँ ऋण पुरानो ऋण तिर्न प्रयोग हुने अवस्था आएको बताए।
पुँजीगत खर्च न्यून भएकाले बजेटले अपेक्षित विकास र रोजगारी सिर्जना गर्न नसक्ने उनको निष्कर्ष थियो ।
