काठमाडौं, १ मंसिर । अर्थमन्त्री डा. स्वर्णिम वाग्लेको निर्देशनपछि भन्सार विभागअन्तर्गत सरुवा गरिएका २७२ कर्मचारीको सरुवा निर्णय रद्द गरिएको छ।
भन्सार विभागले गत कात्तिक २० गते ६९ जना अधिकृत र २०३ जना नायब सुब्बाको सरुवा गरेको थियो। तर, सरुवा प्रक्रिया पारदर्शी र न्यायोचित नभएको भन्दै उजुरी परेपछि अर्थमन्त्री वाग्लेले उक्त निर्णय तत्काल खारेज गर्न निर्देशन दिएका थिए।
उनले सरुवा प्रक्रियालाई पारदर्शी र प्रविधिमैत्री बनाउन नयाँ प्रणाली विकास गरी मापदण्डका आधारमा पुनः सरुवा गर्न मन्त्रालय र विभागका अधिकारीलाई निर्देशन दिएका छन्।
अर्थमन्त्रीको निर्देशनपछि निमित्त अर्थसचिव डा. सुमन दाहालले सरुवा रद्द गर्न विभागलाई पत्राचार गरेका थिए। साथै, सरुवा प्रक्रियामा अनियमितता भए–नभएको विषयमा मन्त्रालयले आन्तरिक छानबिनसमेत सुरु गरेको छ।














