काठमाडौं, २८ जेष्ठ । अर्थमन्त्री डा. स्वर्णिम वाग्लेले विद्युतीय सवारी साधनसम्बन्धी कर निर्धारणमा सूचना चुहावट तथा कर चलखेल गरेको आरोप पुष्टि गर्न चुनौती दिएका छन् ।
बिहीबार सार्वजनिक लेखा समितिको बैठकमा उनले आफूविरुद्ध नियोजित रूपमा भ्रम फैलाउने प्रयास भइरहेको दाबी गर्दै कर वृद्धि सम्बन्धी सूचना चुहावट भएको प्रमाण भए प्रस्तुत गर्न आग्रह गरे ।
कुनै व्यक्तिले कर परिवर्तनको पूर्वसूचना पाएर गाडी भित्र्याएको भए त्यसको कागजी प्रमाण, पत्राचार वा अन्य विवरण ल्याउन उनले चुनौती दिए ।
आफूले कुनै पनि प्रकारको बेइमानी नगरेको बताउँदै वाग्लेले कर निर्धारणमा अनियमितता गरेको प्रमाणित भए अर्थमन्त्री, सांसद तथा सार्वजनिक जीवनसमेत त्याग्न तयार रहेको घोषणा गरे ।
बजेट तथा करसम्बन्धी निर्णयहरू आर्थिक सिद्धान्त, प्रगतिशील कर प्रणाली र दीर्घकालीन आर्थिक हितलाई ध्यानमा राखेर गरिएको उनको भनाइ थियो ।
