काठमाडौं, १२ जेष्ठ । प्रतिनिधि सभाका ६ जना सांसदले तोकिएको समयभित्र सम्पत्ति विवरण नबुझाएको पाइएको छ ।
संघीय संसद् सचिवालयले जेठ १० गतेसम्म सम्पत्ति विवरण पेश गर्न समय दिएकोमा २५४ सांसदले विवरण बुझाएका छन् भने ६ जनाले नबुझाएको सचिवालयका प्रवक्ता एकराम गिरीले जानकारी दिएका छन् ।
सम्पत्ति विवरण नबुझाउनेमध्ये राष्ट्रिय स्वतन्त्र पार्टीका ५ जना र नेपाल कम्युनिस्ट पार्टीका १ जना सांसद रहेका छन् । विवरण नबुझाउने सांसदहरूमा धनबहादुर बुढा, आशा झा, कोमल ज्ञवाली, तपेश्वर यादव, प्रमोद कुमार महतो र रबिन महतो छन् ।
भ्रष्टाचार निवारण ऐनअनुसार सार्वजनिक पद धारण गरेको ६० दिनभित्र सम्पत्ति विवरण पेश गर्नुपर्ने कानुनी व्यवस्था छ ।
