काठमाडौं, ११ जेठ । गणतन्त्र दिवस मूल समारोहलाई यस वर्ष प्रधानमन्त्री बालेन शाहले सम्बोधन नगर्ने भएका छन् ।
यसबारे जानकारी राष्ट्रपति कार्यालयलाई औपचारिक रूपमा दिइसकिएको जनाएका छन् । हरेक वर्ष गणतन्त्र दिवसका अवसरमा सैनिक मञ्च टुँडिखेलमा विशेष समारोह आयोजना हुँदै आएको छ । उक्त कार्यक्रममा राष्ट्रपति, प्रधानमन्त्री, प्रधानन्यायाधीश, सभामुख, राष्ट्रिय सभा अध्यक्ष लगायत उच्च पदस्थ व्यक्तिहरूको उपस्थिति रहने गर्दछ ।
परम्पराअनुसार समारोहलाई प्रधानमन्त्रीले सम्बोधन गर्ने अभ्यास रहँदै आएको छ । तर प्रधानमन्त्री बनेपछि सार्वजनिक समारोहहरूमा कमै देखिएका बालेन शाहले यस वर्षको गणतन्त्र दिवस समारोहमा पनि सम्बोधन नगर्ने निर्णय गरेको हो ।
प्रधानमन्त्री शाहले राष्ट्रपतिलाई सम्बोधन गर्न अनुरोध गर्दै राष्ट्रपति कार्यालयमा पत्र पठाएका छन् । प्रधानमन्त्रि तथा मन्त्रिपरिषदको सचिवलयको जानकारी अनुसार मन्त्रिपरिषद्को निर्णय तथा गणतन्त्रको प्रतीक राष्ट्रपतिलाई मानिने संवैधानिक व्यवस्थालाई आधार बनाउँदै समारोहमा राष्ट्रपतिबाट सम्बोधन गरिनुपर्ने प्रस्ताव गरिएको हो ।
नेपालको संविधानको धारा ६६ मा राष्ट्रपतिको काम, कर्तव्य र अधिकारबारे उल्लेख गरिएको छ । सोही धाराको उपधारा २ अनुसार राष्ट्रपतिले मन्त्रिपरिषद्को सिफारिस र सम्मतिमा कार्य गर्ने व्यवस्था छ । यही संवैधानिक प्रावधानअनुसार यस वर्ष गणतन्त्र दिवस समारोहलाई राष्ट्रपतिले सम्बोधन गर्ने तयारी गरिएको जनाए ।
