जनकपुर, ११ जेष्ठ । जनकपुरधामको पेठिया गाछी क्षेत्रमा रहेको ऐतिहासिक पोखरी अतिक्रमणको चपेटामा परेको भन्दै स्थानीयवासीले चिन्ता व्यक्त गरेका छन् ।
पोखरीको डील क्षेत्रमा पक्की संरचना निर्माण भइरहेको विषयले सार्वजनिक सम्पत्ति संरक्षणमाथि प्रश्न उठाएको छ । स्थानीयका अनुसार धार्मिक, वातावरणीय तथा सार्वजनिक महत्व बोकेको उक्त पोखरी क्षेत्र पछिल्लो समय प्रभाव र पहुँचका आधारमा कब्जा हुँदै गएको छ ।
उनीहरुले तत्काल निर्माण कार्य रोक्न तथा स्थलगत अनुगमन गर्न सम्बन्धित निकायसँग माग गरेका छन् । यस विषयमा त्यहाँ कार्यरत एक कर्मचारीले नाम नखुलाउने सर्तमा यो जग्गा पहिले पोखरीकै थियो, अहिले आएर लालपुर्जा बनाइएको छ दाबी गरे ।
उनका अनुसार गुठी संस्थानका कर्मचारीसमेत कागजात हेर्न आए पनि पछि फर्किएका थिए । ती कर्मचारीले पोखरी पुरेर मदरसा निर्माण भइरहेको आरोप लगाउँदै निर्माणको ठेक्का जनकपुरकै कुवारामपुरका एक ठेकेदारले लिएको बताए ।
स्थानीयले जनकपुरधाम उपमहानगरपालिका, जिल्ला प्रशासन कार्यालय तथा सम्बन्धित निकायसँग सार्वजनिक सम्पत्ति संरक्षणका लागि तत्काल कदम चाल्न माग गरेका छन् ।
