जनकपुर, ११ जेठ । जनकपुर उपमहानगरपालिका–९ स्थित साकेत नगरमा एन्जल्स स्कुलबाट रामानन्द चौक जाने सडकखण्डमा मापदण्डविपरीत निर्माण कार्य भइरहेको आरोप लगाउँदै स्थानीयवासीले सडक निर्माणको काम बन्द गराएका छन् ।
स्थानीय अनिल झाका अनुसार पूर्वाधार निर्देशनालय धनुषाबाट करिब ३० लाख रुपैयाँको बजेटमा १९० मिटर सडक निर्माण योजना सञ्चालनमा रहेको छ ।
तर निर्माण कार्य गुणस्तरहीन तथा प्राविधिक मापदण्डविपरीत भइरहेको भन्दै स्थानीयले विरोध जनाउँदै काम रोक्न बाध्य भएको उनले बताए ।
उनले निर्माण कार्य मापदण्डविपरीत भइरहेको भन्दै असन्तुष्टि व्यक्त गर्दै सडक निर्माण दीर्घकालीन भन्दा पनि असारे बजेट सक्ने उद्देश्यले हतारमा भइरहेको जस्तो देखिएको आरोप लगाए ।
यस्तै, एन्जल्स स्कुलका प्रिन्सिपल रामेश्वर यादवले पहिलेको सडक राम्रो अवस्थामा रहेको सडक भत्काएर बीच सडकमा हेमपाइप राख्ने तथा सडकछेउको नाला पुरिने काम भइरहेको दाबी गरे । 
उनका अनुसार यसरी नाला बन्द गरिए आसपासका घरहरूको पानी निकास प्रणाली प्रभावित हुने र वर्षायाममा डुबानको समस्या सिर्जना हुन सक्ने खतरा रहेको छ ।
सडक निर्माणका नाममा पानी निकास नै बन्द गर्ने काम भइरहेको छ, यादवले भने, यसले स्थानीय बासिन्दालाई दीर्घकालीन समस्या निम्त्याउन सक्छ।
स्थानीयहरूले निर्माण कार्य तत्काल रोक्दै प्राविधिक निरीक्षण गर्न तथा मापदण्डअनुसार पुनः काम सञ्चालन गर्न माग गरेका छन् । यस विषयमा प्रतिक्रिया लिन वडा अध्यक्ष प्रमेश्वर साहसँग सम्पर्क गर्ने प्रयास गरिए पनि उनी सम्पर्कमा आउन सकेनन् ।
