जनकपुर, १० जेष्ठ । विश्वासको मत पाएको दुई दिनमै मधेस प्रदेशका मुख्यमन्त्री कृष्ण प्रसाद यादब नेतृत्वको सरकार सङ्कटमा परेको छ ।
मन्त्रालय भागबण्डामा सत्ता साझेदार दलहरूबीच सहमति नजुट्दा सरकार अस्थिर बन्ने संकेत देखिएको हो । जसपा नेपाल र जनमत पार्टी सरकारबाट बाहिरिएपछि एमाले, कांग्रेस र नेकपाको समर्थनमा मुख्यमन्त्री यादवले जेठ ८ गते विश्वासको मत पाएका थिए ।
तर मन्त्रिपरिषद् पुनर्गठनका क्रममा नेकपाले अर्थ मन्त्रालय दाबी गरेपछि विवाद चर्किएको बताइएको छ । मुख्यमन्त्रीले उक्त मन्त्रालय एमालेलाई दिने सहमति जनाएको चर्चा भएपछि नेकपाभित्र असन्तुष्टि बढेको स्रोतको भनाइ छ ।
नेकपाले सरकारमा रहने वा बाहिरिने विषयमा आन्तरिक छलफल गरिरहेको जनाएको छ । यदि नेकपा सरकारबाट बाहिरिएमा यादव सरकार अल्पमतमा पर्ने सम्भावना देखिएको छ ।
हाल प्रदेश सभामा बहुमतका लागि ५१ सांसद आवश्यक रहेकामा एमाले र कांग्रेससँग मात्रै ४६ मत रहनेछ ।
