काठमाडौं, १० जेष्ठ । प्रतिपक्षी दलहरूले प्रतिनिधिसभाको बैठक सहज बनाउन प्रधानमन्त्री बालेन शाहले संसद्मा उठेका प्रश्नहरूको जवाफ दिनुपर्ने अडान लिएका छन् ।
विपक्षीको विरोधकै बीच अघिल्ला बैठकहरूमा विभिन्न विधेयक पारित भएपछि आइतबार प्रमुख सचेतकहरूबीच छलफल भएको हो । सिंहदरबारमा भएको छलफलमा नेपाली कांग्रेस, एमाले, नेकपा र राप्रपाका प्रमुख सचेतक सहभागी थिए ।
उनीहरूले संसद्मा प्रधानमन्त्रीसँग प्रत्यक्ष प्रश्नोत्तर कार्यक्रम सञ्चालन गर्न सभामुखसँग पुनः माग गर्ने बताएका छन् । प्रतिनिधिसभा नियमावलीको नियम ५६ अनुसार प्रत्येक महिनाको पहिलो हप्तामा प्रधानमन्त्रीसँग प्रत्यक्ष प्रश्नोत्तर हुनुपर्ने व्यवस्था भए पनि जेठ महिनामा हालसम्म यस्तो कार्यक्रम सञ्चालन हुन सकेको छैन ।
अब जेठ १२ गते बस्ने बैठकमा विपक्षी दलहरूले प्रधानमन्त्रीको जवाफ खोज्ने तयारी गरेका छन् ।
