वीरगन्ज, २ जेष्ठ । वीरगन्ज महानगरपालिकाका मेयर राजेशमान सिंहसहित चार जनाविरुद्ध पर्सा जिल्ला अदालतमा लिखत सम्बन्धी कसुरको मुद्दा दर्ता भएको छ ।
झुटा विवरण र प्रमाण पेस गरी नागरिकता तथा राहदानी बनाएको आरोपमा जिल्ला महान्यायाधिवक्ता कार्यालयले शुक्रबार मुद्दा दर्ता गरेको हो ।
मुद्दामा मेयर सिंह, रिता भट्टराई, रुविना श्रेष्ठ तथा महानगरपालिकाका तत्कालीन पञ्जीकरण अधिकारी भिखारी रायलाई प्रतिवादी बनाइएको छ ।
उनीहरूविरुद्ध मुलुकी अपराध संहिता, नागरिकता ऐन तथा अपराध पीडित संरक्षण ऐनअन्तर्गत विभिन्न सजाय र जरिवानाको माग गरिएको अदालतले जनाएको छ ।
आरोप अनुसार मेयर सिंहले रिता भट्टराईलाई आफ्नी श्रीमती भएको झुटा विवरण दिई २०७१ मा रुविनाको जन्मदर्ता गराएका थिए । सोही आधारमा २०७५ मा नागरिकता र राहदानी बनाइएको दाबी गरिएको छ ।
