काठमाडौं, २४ बैशाख । सिराहाको बरियारपट्टीस्थित छोटी भन्सार कार्यालय बन्द गर्ने सरकारी निर्णयविरुद्ध स्थानीयवासी र व्यापारीहरूले आन्दोलन गरेको छ ।
आन्दोलनका कारण हुलाकी राजमार्ग अवरुद्ध हुँदा सवारी आवागमन प्रभावित बनेको छ । सरकारले वैशाख २४ गते राजपत्रमार्फत बरियारपट्टी छोटी भन्सार कार्यालय बन्द गर्ने निर्णय सार्वजनिक गरेपछि त्यसको विरोधमा स्थानीयवासी सडकमा उत्रिएको हो ।
आन्दोलनकारीहरूले बरियारपट्टी गाउँपालिका–३ को बरियारपट्टी चोकमा प्रदर्शन गर्दै बिहानदेखि सडक अवरुद्ध गरेका थिए । सडकको बीचभागमा बेन्च राखेर गरिएको प्रदर्शनका कारण हुलाकीमार्ग हुँदै हुने पूर्व–पश्चिम यात्रा प्रभावित भएको स्थानीयले बताए ।
आन्दोलनरत पक्षले छोटी भन्सार कार्यालय पुनः सञ्चालन गर्नुपर्ने माग राख्दै सरकारसँग निर्णय फिर्ता लिन आग्रह गरेका छन् । उता, जिल्ला प्रहरी कार्यालय सिरहाले आन्दोलनकारीसँग वार्ता भइरहेको जनाएको छ ।
प्रहरीका अनुसार अवरुद्ध सडक खुलाउने प्रयास जारी छ। प्रहरी प्रमुख एसपी बासुदेव पाठकसहित सुरक्षा अधिकारीहरू घटनास्थलमा परिचालित भएका छन् । प्रदर्शनमा बजार व्यवस्थापन समिति तथा उद्योग–व्यापारसँग आबद्ध प्रतिनिधि, जनप्रतिनिधि र स्थानीयवासीको उल्लेख्य सहभागिता रहेको थियो।
