जनकपुर, ६ वैशाख । धनुषा निर्वाचन क्षेत्र नं. ३ का प्रतिनिधिसभा सदस्य मनिष झाको पहलमा जनकपुरका विभिन्न स्थानमा सडक बत्ती मर्मत तथा सञ्चालन गर्ने काम सुरु गरिएको छ ।
लामो समयदेखि निभेका कारण अँध्यारो बनेका सडकहरूमा बत्ती बाल्ने कार्यलाई प्राथमिकता दिइएको उनको सचिवालयले जनाएको छ ।
सचिवालयका अनुसार स्थानीयवासीबाट सुरक्षा तथा आवागमनमा समस्या भएको गुनासो आएपछि यो अभियान अघि बढाइएको हो । अहिले सम्बन्धित निकायसँग समन्वय गरेर बिग्रिएका तथा निभेका बत्तीहरू मर्मत गर्ने, आवश्यक स्थानमा नयाँ बत्ती जडान गर्ने काम भइरहेको छ ।
यो काम एक महिनाभित्र सम्पन्न गर्ने लक्ष्य राखिएको छ । सडक बत्ती सञ्चालनमा आएपछि रातिको समयमा आवागमन सहज हुनुका साथै चोरी-डकैतीजस्ता आपराधिक गतिविधि नियन्त्रणमा समेत सहयोग पुग्ने सचिवालयले जनाएको छ ।
