काठमाडौं, ६ बैशाख । विश्वविद्यालयहरूको सेवा सुधार गर्न महत्वपूर्ण निर्णयहरू गरिएको छ । अबदेखि परीक्षाको नतिजा सार्वजनिक भएको १५ दिनभित्रै विद्यार्थीले ट्रान्सक्रिप्ट पाउने व्यवस्था लागू गरिने भएको छ ।
शिक्षा, विज्ञान तथा प्रविधि मन्त्रालयको उपस्थितिमा विभिन्न विश्वविद्यालयका उपकुलपतिहरूले यस्तो सहमति गरेको हो । यससँगै परीक्षाफल प्रकाशनलाई व्यवस्थित र पूर्वानुमानयोग्य बनाउन प्रत्येक विश्वविद्यालयले नतिजा पोर्टल सञ्चालन गर्ने निर्णय पनि गरिएको छ ।
उच्च शिक्षाको शैक्षिक क्यालेन्डरलाई प्रभावकारी बनाउन विश्वविद्यालय अनुदान आयोगको समन्वयमा समिति गठन गरिने र त्यसले छिट्टै सुधारिएको क्यालेन्डर तयार गर्नेछ । विद्यार्थी सेवामा सुधार ल्याउन गुनासो व्यवस्थापन प्रणालीलाई पनि सुदृढ बनाइने भएको छ ।
फोन, मोबाइल एप, पोर्टल र सामाजिक सञ्जालमार्फत २४ घण्टा गुनासो दर्ता गर्न सकिने व्यवस्था मिलाइनेछ । त्यसैगरी, शैक्षिक प्रमाणपत्रहरू डिजिटल माध्यमबाट—मोबाइल एप, नागरिक एप वा इमेलमार्फत डाउनलोड गर्न मिल्ने प्रणाली पनि विकास गरिने निर्णय भएको छ।
