काठमाडौं, ६ बैशाख । भुटानी शरणार्थी समस्या समाधानका लागि नेपाल सरकारलाई कूटनीतिक पहल गर्न आग्रह गरिएका छन् ।
दुई दशकभन्दा बढी समयदेखि समाधानविहीन रहेको यो मुद्दामा सक्रिय भूमिका खेल्न भन्दै प्रधानमन्त्री बालेन्द्र शाहलाई खुला पत्रमार्फत ध्यानाकर्षण गराइएको हो । अन्तर्राष्ट्रिय स्तरमा सक्रिय अधिकारकर्मीहरू र शरणार्थी समुदायका प्रतिनिधिहरूले संयुक्त रूपमा पठाएको पत्रमा भुटानबाट नेपालीभाषी नागरिकहरूलाई विगतमा जबरजस्ती निष्कासन गरिएको र त्यसका कारण ठूलो सङ्ख्यामा मानिसहरू नेपालमा शरण लिन बाध्य भएको उल्लेख गरिएको छ ।
यद्यपि, धेरै शरणार्थीहरू तेस्रो देशमा पुनःस्थापित भइसके पनि अझै हजारौँ मानिस नेपालमै अनिश्चित भविष्यसँग जुधिरहेको छ । पत्रमा बाँकी शरणार्थीहरूको जीवन कठिन बन्दै गएको, आधारभूत सेवा र सहयोग घट्दै गएको तथा उनीहरूको स्वदेश फर्कने अधिकार अझै सुनिश्चित हुन नसकेको विषय उठाइएको छ।
साथै, भुटानमा रहेका नेपालीभाषी राजनीतिक बन्दीहरूको अवस्थाप्रति पनि चिन्ता व्यक्त गर्दै उनीहरूको रिहाइका लागि पहल आवश्यक रहेको बताइएको छ । पत्रमार्फत नेपाल सरकारले भुटानसँग पुनः संवाद सुरु गरी शरणार्थीहरूको सुरक्षित, स्वेच्छिक र सम्मानजनक पुनःस्थापनाका लागि पहल गर्नुपर्ने माग गरिएको छ। साथै, नेपालमै रहेका शरणार्थी र रिहा भएका बन्दीहरूलाई आवश्यक कागजात, सेवा र संरक्षण उपलब्ध गराउन पनि जोड दिइएको छ ।
