काठमाडौँ, २९ चैत। प्रख्यात भारतीय गायिका आशा भोसलेको ९२ वर्षको उमेरमा निधन भएको छ।
हृदयाघात तथा श्वासप्रश्वाससम्बन्धी जटिलताका कारण शनिबार अस्पताल भर्ना गरिएकी भोसलेले आइतबार दिउँसो अन्तिम सास फेरेको भारतीय सञ्चारमाध्यमले जनाएका छन्।
पछिल्ला केही महिनादेखि स्वास्थ्य समस्यासँग संघर्ष गरिरहेकी उनी शनिबार राति मुम्बईस्थित ब्रिच क्यान्डी अस्पतालको सघन हेरचाह कक्ष (ICU) मा भर्ना गरिएको थियो। उनका छोरा आनन्दले आइतबार दिउँसो निधनको पुष्टि गरेका छन्।
भोसलेको अन्तिम संस्कार सोमबार गरिने बताइएको छ।
सन् १९३३ मा मंगेशकर परिवारमा जन्मिएकी भोसलेले सानै उमेरदेखि संगीत यात्रा सुरु गरेकी थिइन्। ९ वर्षकै उमेरमा व्यावसायिक रूपमा गायन थालेकी उनले सन् १९४३ मा पहिलो गीत रेकर्ड गराएकी थिइन्।
आठ दशकभन्दा लामो आफ्नो सांगीतिक यात्रामा उनले हजारौँ गीत गाइन्। बलिउडका साथै विभिन्न क्षेत्रीय भाषामा समेत उनले स्वर दिएकी थिइन्।
नेपाली चलचित्रका ‘वसन्त नै लुक्न खोज्छ यहाँ’, ‘मोहनी लाग्ला है’, ‘तिम्रो मनमा लुकेको कुरा’, ‘गैह्रीखेतको शिरै हान्यो’ र ‘एउटा मान्छे मन पर्छ बोल्न सक्दिनँ’ जस्ता गीतहरूमा पनि उनको आवाज लोकप्रिय छ।
