जनकपुरधाम, १८ फागुन । मिथिलाको महाकुम्भका रूपमा परिचित मिथिला माध्यमिकी परिक्रमा आज सोमबार जनकपुरधाम आइपुगेको छ ।
फागुन ४ गतेदेखि विधिवत् रूपमा सुरु भएको यस ऐतिहासिक परिक्रमामा सहभागी साधुसन्त, महन्त तथा हजारौँ श्रद्धालुहरू सोमबार बिहान जनकपुरधाम प्रवेश गरेका हुन् ।
परिक्रमामा सहभागी श्रद्धालुहरूले आज राति १ बजेदेखि जनकपुरधाम नगरभित्र विशेष धार्मिक परम्पराअनुसार अन्तगृह (पञ्चकोसी) परिक्रमा गर्ने चलन रहेको छ । यस अन्तगृह परिक्रमालाई माध्यमिकी परिक्रमा अन्तर्गतको अत्यन्त महत्वपूर्ण विधिका रूपमा लिइन्छ । अन्तगृह परिक्रमा सम्पन्न भएपछि मधेस क्षेत्रमा परम्परागत रूपमा होली पर्व मनाउने चलन रहिआएको छ ।
धार्मिक विश्वासअनुसार फागुन औँसीका दिन धनुषाको ठेरा कचुरीबाट निस्कने मिथिला बिहारीको डोला र जनकपुरधामस्थित अग्निकुण्डबाट निस्कने किशोरीजीको डोला जानकी मन्दिर हुँदै जनकपुरको हनुमाननगर पुगेपछि परिक्रमा विधिवत् रूपमा प्रारम्भ हुने परम्परा छ ।
इतिहासअनुसार १८औँ शताब्दीमा सन्त सियालालजी शरण ले यस परिक्रमा परम्पराको प्रारम्भ गरेको मान्यता छ । नेपाल र भारतबीचको धार्मिक, सांस्कृतिक तथा पारम्परिक सद्भावको प्रतीक मानिने यस परिक्रमामा नेपालका १३ र भारतका २ गरी कुल १५ विश्रामस्थल पार गर्दै करिब १३३ किलोमिटर पैदल यात्रा गरिन्छ ।
हरेक वर्षझैँ यस वर्ष पनि परिक्रमाका कारण जनकपुरधामसहित सम्पूर्ण मिथिला क्षेत्रमा धार्मिक उत्साह, भक्तिमय वातावरण र चहलपहल बढेको छ । स्थानीय बासिन्दा, संघसंस्था तथा सुरक्षानिकायहरू परिक्रमालाई व्यवस्थित बनाउन सक्रिय देखिएका छन् ।
