महोत्तरी, १६ फागुन । महोत्तरी निर्वाचन क्षेत्र नं. २ का प्रतिनिधिसभा सदस्य उम्मेदवार डा. राकेश मण्डलको बसाइँ र मतदातासँगको भेटघाटमा पछिल्लो समय अनौठो तर अर्थपूर्ण दृश्य देखिन थालेको छ ।
चुनावी माहोल तातिरहेका बेला उनले अपनाएको फरक अभियान शैलीले स्थानीयवासीको ध्यान खिचेको छ । डा. मण्डल घरदैलो कार्यक्रमका क्रममा ठाउँ–ठाउँमा मतदातासँगै बसेर रोटी खाँदै मत मागिरहेको देखिन्छ ।
अझ रोचक पक्ष के छ भने, उनले बाहिरबाट महँगो भोज–भतेरको व्यवस्था नगरी आफ्नै घरबाट रोटी बनाएर गाउँ–टोलमा पुग्ने गरेका छन् ।
उनले मतदातासँग संवाद गर्दै भनेका छन्, “अरूजस्तो पैसा खर्च गरेर राजनीति गर्ने होइन, म त आफ्नै घरबाट खाना बनाएर जनताको घरदैलोमा आएको हुँ ।” उनको भनाइले पैसा र प्रभावको राजनीतिभन्दा साधारण जीवनशैली र आत्मीय सम्बन्धलाई प्राथमिकता दिने सन्देश दिएको स्थानीयको बुझाइ छ ।
उज्यालो पार्टीका उम्मेदवार रहेका डा. मण्डलको यस अभियानलाई धेरैले ‘जनतासँग नजिकिने नयाँ अभ्यास’ को रूपमा लिएका छन् । कतिपय मतदाताले यस्तो शैलीले उम्मेदवारको सोच, इमान्दारिता र जीवनशैली प्रत्यक्ष बुझ्न पाइने प्रतिक्रिया दिएका छन् ।
