काठमाडौं, ८ फागुन । कैलालीको धनगढीमा आयोजित राष्ट्रिय स्वतन्त्र पार्टी (रास्वपा) को चुनावी सभामा समाचार संकलन गर्न पुगेका पत्रकारहरू अवरोधमा परेका छन् ।
पार्टीका कार्यकर्ताले ‘पास अनिवार्य’ भन्दै सञ्चारकर्मीलाई सभास्थल प्रवेश गर्न नदिएको र धकेलाधकेलसहित दुव्र्यवहार गरेको आरोप लागेको छ । यस घटनाप्रति गम्भीर आपत्ति जनाउँदै नेपाल पत्रकार महासंघ ले कडा शब्दमा भत्र्सना गरेको छ ।
महासंघको सुदूरपश्चिम प्रदेश समितिका अनुसार फागुन ६ गते आयोजित सभामा रिपोर्टिङका लागि पुगेका पत्रकारहरूलाई कार्यकर्ताले जबर्जस्ती रोकेका थिए ।
अवरोधका क्रममा केही पत्रकारमाथि हातपातजस्तो व्यवहारसमेत भएको जनाइएको छ । महासंघले फागुन ७ गते जारी गरेको विज्ञप्तिमा उक्त घटनालाई लोकतान्त्रिक मूल्य–मान्यताको अपमान र प्रेस स्वतन्त्रतामाथिको आघात भएको ठहर गरेको छ । विज्ञप्तिमा भनिएको छ, “संवैधानिक अधिकार प्रयोग गरिरहेका पत्रकारमाथि जिम्मेवार राजनीतिक दलका कार्यकर्ताबाट भएको यस्तो व्यवहार निन्दनीय छ ।
महासंघले सम्बन्धित दल र तिनका कार्यकर्तालाई प्रेस स्वतन्त्रताको सम्मान गर्न आग्रह गर्दै यस्ता गैरजिम्मेवार गतिविधि दोहोरिन नदिन चेतावनी दिएको छ । साथै, पत्रकारले निर्बाध रूपमा समाचार संकलन गर्न पाउने वातावरण सुनिश्चित गर्न सम्बन्धित पक्षको ध्यानाकर्षण गराइएको छ ।
