जनकपुर, ८ फागुन । धनुषा निर्वाचन क्षेत्र नं.३ बाट नेपाली कांग्रेसका प्रतिनिधिसभा उम्मेदवार बिमलेन्द्र निधि यतिबेला घरदैलो अभियानमा सक्रिय देखिएका छन् ।
निर्वाचन नजिकिँदै जाँदा निधि गाउँ–गाउँ, टोल–टोल पुगेर मतदातासँग प्रत्यक्ष भेटघाट गर्दै आफ्ना एजेन्डा र प्रतिबद्धता प्रस्तुत गरिरहेका छन् ।
घरदैलो क्रममा निधिले जनताका समस्या, गुनासा र अपेक्षालाई ध्यानपूर्वक सुन्दै आएको बताएका छन् । शिक्षा, स्वास्थ्य, रोजगारी, कृषि तथा पूर्वाधार विकासलाई आफ्नो प्राथमिकतामा राख्दै उनले धनुषाको समग्र विकासका लागि निरन्तर पहल गर्ने प्रतिबद्धता जनाएका छन् ।
“जनताको विश्वास नै मेरो मुख्य शक्ति हो,” भन्दै उनले संविधानको रक्षा, लोकतन्त्रको सुदृढीकरण र समावेशी विकास कांग्रेसको मूल एजेन्डा भएको उल्लेख गरे ।
स्थानीय बासिन्दासँगको संवादमा निधिले विगतमा आफूले निर्वाह गरेका जिम्मेवारी र विकासका प्रयासबारे जानकारी गराउँदै आगामी दिनमा अझ प्रभावकारी रूपमा क्षेत्रको आवाज संसदमा उठाउने आश्वासन दिएका छन् ।
उनका अनुसार युवालाई रोजगारी, किसानलाई सहज सुविधा र आम नागरिकलाई गुणस्तरीय सेवा उपलब्ध गराउने लक्ष्यसहित कांग्रेस चुनावी मैदानमा उत्रिएको हो ।
घरदैलो अभियानका क्रममा कांग्रेसका स्थानीय नेता–कार्यकर्ता, महिला तथा युवा समूहको उल्लेखनीय सहभागिता देखिएको छ ।
