जनकपुर, १९ माघ । धनुषा जिल्लामा नेपाली कांग्रेसको संगठन सुदृढ हुँदै गएको संकेत देखिएको छ ।
नेकपा एमालेबाट निर्वाचित धनुषाको बटेश्वर गाउँपालिका–५ का वडा सदस्य तथा वडा अध्यक्ष अशोककुमार यादवले पार्टी परित्याग गर्दै नेपाली कांग्रेसमा प्रवेश गरेका छन ।
यादवले एमालेको साधारण सदस्यसमेत त्यागेको औपचारिक घोषणा गर्दै कांग्रेसको सदस्यता ग्रहण गरेका छन । धनुषा क्षेत्र नं. ४ बाट प्रतिनिधिसभा उम्मेदवार महेन्द्र यादवले टीका–माला लगाएर नेपाली कांग्रेसमा स्वागत गर्नुभयो ।
पार्टी प्रवेश कार्यक्रममा स्थानीय नेता, कार्यकर्ता तथा सर्वसाधारणको उल्लेखनीय उपस्थिति रहेको थियो । यसै क्रममा धनुषाका युवा नेता अजय राउतसहित अन्य स्थानीय युवाहरू पनि नेपाली कांग्रेसमा प्रवेश गरेका छन् । अजय राउत २०७४ सालको स्थानीय तह निर्वाचनमा बटेश्वर गाउँपालिका–५ को वडाध्यक्ष पदका प्रत्यासी थिए ।
त्यस निर्वाचनमा पराजय भोग्नुपरे पनि उहाँ २०७९ को स्थानीय तह निर्वाचनमा बटेश्वर गाउँपालिकाको अध्यक्ष पदका प्रत्यासी बनेका थिए । यद्यपि, उक्त निर्वाचनमा पनि उहाँ सफल हुन सक्नुभएन ।
हालै लोकतान्त्रिक समाजवादी पार्टी (लोसपा) बाट राजीनामा दिएपछि राउत नेपाली कांग्रेसमा प्रवेश गरेका छन । पार्टी प्रवेशपछि राउतले लोकतान्त्रिक मूल्य, समावेशी राजनीति र युवामैत्री सोचका कारण कांग्रेस रोजेको बताउनुभयो ।
कार्यक्रमलाई सम्बोधन गर्दै धनुषा–४ का उम्मेदवार महेन्द्र यादवले युवाशक्ति र सक्रिय नेतृत्वलाई पार्टीमा समेट्नु आजको आवश्यकता भएको उल्लेख गरे ।
उहाँले अजय राउतजस्ता ऊर्जाशील र अनुभवी युवा नेताको प्रवेशले कांग्रेसलाई आगामी निर्वाचनमा रणनीतिक लाभ पुग्ने विश्वास व्यक्त गर्नुभयो ।
