काठमाडौं, १५ माघ । राष्ट्रिय स्वतन्त्र पार्टी (रास्वपा) ले आगामी प्रतिनिधिसभा निर्वाचनलाई लक्षित गर्दै संघीय निर्वाचन सम्पादन समिति गठन गरेको छ ।
पार्टीले उपसभापति डीपी अर्यालको संयोजकत्वमा ५१ सदस्यीय समिति बनाएको हो । फागुन २१ गते हुने प्रतिनिधिसभा निर्वाचनमा दुई तिहाइ बहुमत हासिल गर्ने लक्ष्यसहित पार्टी चुनावी तयारीमा जुटेको रास्वपाले जनाएको छ ।
सोही उद्देश्यअनुसार निर्वाचनसम्बन्धी सम्पूर्ण कामलाई प्रभावकारी, व्यवस्थित र परिणाममुखी बनाउन संघीय निर्वाचन सम्पादन समिति गठन गरिएको पार्टीको भनाइ छ ।
उपसभापति अर्याल संयोजक रहेको समितिमा शंकर श्रेष्ठलाई सदस्य सचिवको जिम्मेवारी दिइएको छ । समितिले उम्मेदवार छनोट, निर्वाचन रणनीति, प्रचार–प्रसार, संगठन विस्तार तथा मतदाता परिचालनलगायत कार्य समन्वय गर्नेछ ।
त्यसैगरी, पार्टीले सातै प्रदेशमा समेत निर्वाचन संयोजक तोकेको छ । संघीय समितिसँग समन्वय गर्दै प्रदेशस्तरमा चुनावी गतिविधि सञ्चालन गर्न उनीहरूलाई जिम्मेवारी दिइएको जनाइएको छ ।
निर्वाचनलाई थप प्रभावकारी बनाउन पार्टीले तीन वटा विशेष उपसमिति पनि गठन गरेको छ । ती उपसमितिहरूले आ–आफ्नो क्षेत्रबाट चुनावी व्यवस्थापन, प्रचार रणनीति र प्राविधिक समन्वयको काम गर्ने बताइएको छ ।
