बारा, १४ माघ । बाराको परवानीपुर गाउँपालिका–१ रहरियाडीमा धारिलो हतियार प्रहार गरी आमा–छोराको निर्मम हत्या भएको छ भने बुबासहित तीन जना गम्भीर घाइते भएका छन् ।
घटनाले स्थानीयवासीलाई स्तब्ध बनाएको छ । मृत्यु हुनेमा ३२ वर्षीय रामेश्वर मण्डल र उनकी ५२ वर्षीया आमा सुमित्री देवी रहेका छन् । आक्रमणमा परी रामेश्वरका बुबा जगरुक मण्डल गम्भीर घाइते भएका छन् भने अन्य दुई जना पनि घाइते भएको प्रहरीले जनाएको छ ।
जिल्ला प्रहरी कार्यालय बाराका प्रहरी उपरीक्षक नरेन्द्र कुँवरका अनुसार आज बिहान करिब ३ बजेको समयमा एक अज्ञात व्यक्ति घरभित्र पसेर धारिलो हतियार प्रयोग गरी अन्धाधुन्ध आक्रमण गरेको प्रारम्भिक अनुसन्धानबाट खुलेको छ । आक्रमण यति क्रूर थियो कि घटनास्थलमै आमा–छोराको ज्यान गएको प्रहरीले जनाएको छ ।
घाइते तीनै जनालाई तत्काल उपचारका लागि परवानीपुरस्थित एलएस न्युरो अस्पतालमा भर्ना गरिएको छ । बुबा जगरुक मण्डलको अवस्था गम्भीर रहेको अस्पताल स्रोतले जनाएको छ । घटनाको जानकारी पाएलगत्तै प्रहरी टोली घटनास्थलमा पुगेर अनुसन्धान सुरु गरेको छ ।
आक्रमणको कारण र संलग्न व्यक्तिको पहिचान खुल्न बाँकी रहेको र घटनामा संलग्नको खोजी तीव्र पारिएको एसपी कुँवरले बताए । “हामी घटनास्थलमा पुगेर अनुसन्धान सुरु गरेका छौं ।
रातिको समयमा एक व्यक्तिले घरभित्र पसेर धारिलो हतियार प्रहार गरेको भन्ने सूचना आएको छ,” उनले भने । प्रहरीले यस घटनालाई गम्भीर आपराधिक घटनाका रूपमा लिएर अनुसन्धान अघि बढाएको छ ।
