काठमाडौँ, १३ माघ । स्वास्थ्य बिमा बोर्डले स्वास्थ्य बिमाको सही सदुपयोग गर्न सबैलाई आग्रह गरेको छ ।
बोर्डले सूचना जारी गर्दै अनावश्यक परीक्षणका लागि चिकित्सक वा स्वास्थ्यकर्मीलाई दबाब नदिन र सेवा प्रदायक संस्थाहरूले औचित्यका आधारमा मात्र चेकजाँच, ल्याब परीक्षण तथा उपचार गर्न निर्देशन दिएको छ ।
बोर्डका अनुसार सीमित स्रोतसाधन र संरचनागत चुनौतीका बाबजुद पनि स्वास्थ्य बिमा कार्यक्रममार्फत दैनिक करिब ५० हजार नागरिकले सेवा लिइरहेका छन् र दैनिक औसत ८ करोड रुपैयाँ बराबरको खर्च आम नागरिकको गोजीबाट जोगिएको छ ।
स्वास्थ्य बिमा ऐन, २०७४ तथा नियमावली, २०७५ अनुसार सामाजिक स्वास्थ्य सुरक्षाको मेरुदण्डका रूपमा कार्यक्रम सञ्चालन भइरहेको बोर्डले जनाएको छ।
सेवा अवरुद्ध भएका स्वास्थ्य संस्थाहरूलाई पुनः सञ्चालनमा ल्याउन निरन्तर पहल भइरहेको र स्वास्थ्य बिमा कार्यक्रमलाई अझ प्रभावकारी तथा नागरिकमैत्री बनाइने बोर्डले स्पष्ट पारेको छ ।
